Kjöt í karrí
Kjöt í karrísósu er einn af okkar góðu þjóðarréttum og oftar en ekki er soðið súpukjöt eða afgangar frá deginum áður af lambakjöti notað í pottrétt. Þarna ákvað ég að prufa nýja aðferð og setti réttinn ofan á hrísgrjón og inni í ofn.
Lambakjöt
Krydd (Seson All)
2.pk karrísósa frá Toro
2.pk hrísgrjónapokar
Kartöflur
Smjörlíki
Mjólk
Ég byrja alltaf á því að krydda kjötið og steikja það aðeins á báðum hliðum og helli vatni svo yfir og læt suðuna koma upp, lækka þá niður og læt malla alveg í góðan klukkutíma, jafnvel aðeins lengur svo að kjötið verði ofur meyrt og gott.
Ég útbý svo karrísósuna og í þetta sinn þá bakaði ég upp karrísósu í pakka frá Toro með því að bræða smjörlíki, ca 100 gr og svo bætti ég 2.pk út í og þynni með mjólk þar til létt og ljúft.
Ég sýð svo kartöflur og hrísgrjón og þegar allt er tilbúið þá byrja ég á að setja hrísgrjónin í botninn á eldföstu móti, brytja svo kjötið niður og set ofan á grjónin, sker kartöflurnar í bita og bæti ofan á líka og helli svo sósunni yfir.
Fyrir þá sem vilja þá geta þeir sett ost ofan á og gratenerað réttinn þannig.
Borið fram með góðu brauði eftir smekk.
Vertu velkomin að koma og vera með í Heimilismatur hópnum á feisbókinni
